"ಕಾರ್ಯ"ದರ್ಶಿಯವರ "ಪ್ರವಾಸ".....

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಕರ್ನಾಟಕ ಸರಕಾರದ ಮುಖ್ಯ ಕಾರ್ಯದರ್ಶಿ ಸುಧಾಕರ ರಾವ್ ಶುಕ್ರವಾರದಂದು ಆಗಮಿಸಿದರು.

ಈ ಸಂದರ್ಭದಲ್ಲಿ ಅವರನ್ನು ಪೆರೇಡ್ ಮೂಲಕ ಸ್ವಾಗತಿಸಲಾಯಿತು.ನಂತರ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಟಿ.ವಿ.ಭಟ್ ಹಾಗೂ ದೇವಳದ ಕಾರ್ಯನಿರ್ವಹಣಾಧಿಕಾರಿ ನಿಂಗಯ್ಯ ಕಾರ್ಯದರ್ಶಿಯವರನ್ನು ಬರಮಾಡಿಕೊಂಡರು.

ದೇವಳದಲ್ಲಿ ಪೂಜೆ ಸಲ್ಲಿಸಿದ ನಂತರ ಧರ್ಮಸ್ಥಳ ,ಕಟೀಲು ದೇವಸ್ಥಾನಗಳಿಗೆ ತೆರಳುವರೆಂದು ಕಾರ್ಯದರ್ಶಿಯವರ ಆಪ್ತವಲಯ ಹೇಳಿದೆ.ಆದರೆ ರಾಜ್ಯ ಮುಖ್ಯ ಕಾರ್ಯದರ್ಶಿ ಸುಧಾಕರ ರಾವ್ ದೇವಳದ ದರ್ಶನದೊಂದಿಗೆ ಪುತ್ತೂರು ತಾಲೂಕಿನ ಕೊಯಿಲ ಎಂಬಲ್ಲಿರುವ ಪಶುಸಂಗೋಪನಾ ಇಲಾಖೆಗೆ ಸೇರಿದ ಸುಮಾರು 700 ಎಕ್ರೆ ಭೂಮಿಯನ್ನು ಐಟಿ ಕಂಪೆನಿಗಳಿಗೆ ವಹಿಸುವ ಕುರಿತು ಜಿಲ್ಲಾಧಿಕಾರಿಗಳೊಂದಿಗೆ ಮಾತುಕತೆ ನಡೆಸುವ ಬಗ್ಗೆ ಜಿಲ್ಲೆ ಆಗಮಿಸಿದ್ದಾರೆಂಬ ಊಹಾಪೋಹಗಳು ಕೇಳಿಬಂದಿದೆ.ಆದರೆ ಕಾರ್ಯದರ್ಶಿಯವರ ಆಪ್ತ ವಲಯವು ಈ ಬಗ್ಗೆ ಏನನ್ನೂ ಹೇಳಿಲ್ಲ.

ಇನ್ನೊಂದು ಮಾಹಿತಿಯಂತೆ ಇತ್ತೀಚೆಗೆ ಸಂಪುಟದ ಅನುಮತಿ ದೊರಕಿದ ಕರ್ನಾಟಕ ರಾಜ್ಯ ಹೆದ್ದಾರಿಗಳನ್ನು ಮೇಲ್ದರ್ಜೆಗೇರಿಸುವ ಬೃಹತ್ ಕೇಶಿಪ್ ಯೋಜನೆಯ ಪೈಕಿ ಬಿಸಲೆ-ಉಪ್ಪಿಂಗಡಿ ರಸ್ತೆ ಸಮೀಕ್ಷೆ ಹಾಗೂ ಬಜ್ಪೆ ವಿಮಾನ ನಿಲ್ದಾಣ ಆಧುನೀಕರಣದ ವೀಕ್ಷಣೆಗಾಗಿ ಜಿಲ್ಲೆಗೆ ಆಗಮಿಸಿದ್ದಾರೆ ಎಂಬ ಅಧಿಕೃತ ಮಾಹಿತಿಯೂ ಇದೆ.ಈ ಸಂದರ್ಭದಲ್ಲಿ ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರದ ಸಮಗ್ರ ಅಭಿವೃದ್ಧಿಗಾಗಿ ರೂಪಿಸಲಾಗುತ್ತಿರುವ ಮಾಸ್ಟರ್ ಪ್ಲಾನ್ ಬಗ್ಗೆ ಧರ್ಮದರ್ಶಿ ಮಂಡಳಿ ಹಾಗೂ ಅಧಿಕಾರಿಗಳ ಸಭೆ ನಡೆಸಿ ಮಾಹಿತಿ ಪಡಕೊಂಡರು ಎಂದು ಅಧಿಕೃತ ಮಾಹಿತಿ.


ಕೊಯಿಲದಲ್ಲಿ ಈಗ ಪಶು ಸಂಗೋಪನಾ ಇಲಾಖೆಗೆ ಸೇರಿದ ಆಸ್ಥಿಯಿದೆ.ಅದರಲ್ಲಿ ಯಾವುದೇ ಲಾಭವಿಲ್ಲದ ಕಾರಣ ಸರಕಾರವು ಐ.ಟಿ ಕಂಪೆನಿಗಳಿಗೆ ನೀಡಲು ಚಿಂತನೆ ನಡೆಸುತ್ತಿದೆ ಎಂಬ ಸುದ್ದಿ ಇದೆ.

ಅಂತೂ ರಾಜ್ಯ ಕಾರ್ಯದರ್ಶಿಯವರು ಸುಬ್ರಹ್ಮಣ್ಯಕ್ಕೆ ಆಗಮಿಸಿದರು.ದೇವರಲ್ಲಿ ಪ್ರಾರ್ಥಿಸಿದರು. ಏನೆಂದು ಗೊತ್ತಿಲ್ಲ. ಕೊಯಿಲದ ಕೆಲಸ ಸುಲಭವಾಗಲೋ....?. ಮುಂದೆ ಮೇ ತಿಂಗಳಲ್ಲಿ ನಡೆಯಲಿರುವ ಚುನಾವಣೆ ಸಾಂಗವಾಗಲೋ...? ಉತ್ತಮ ಸರಕಾರ ಬರಲೋ....? ಅಥವಾ ಕುಟುಂಬದ ಹಿತಕ್ಕೋ.....?